191

好興奮! 新高點!

我真的係07年reach 到target, 好開心!

初初打左3局都已經好累, 都諗住走, 有人話打多局啦, 就係咁191分就係第四局出現,好開心呀!

我成晚真係有俾心機去打, 我有聽ah sir話準備時個身企側少少, 行果幾步比d節奏, 個人助低d, 最後果步要穩定d, 我有諗清楚d動作先去打架, 真係有改善.

分數都係其次, 有進步先係重點 :)

仲有多謝Kerr sir 每球既提點!

楊千嬅

千嬅隻新碟勁好聽, 後悔咁遲先買!
繼周杰倫之後, 近呢個幾星期每日都要聽下先捨得訓.
對上個幾隻唱片的確麻麻地, 我以為佢用哂d心機拍戲.
我係勁鍾意佢以前唱郎來了同再見二丁目既時候, d聲好溫柔, 宜家唱歌成日好用力咁, 有時唔得自然.
不過今隻又有番d變化, 歌詞一般, 不過有d旋律幾好聽.
我對佢有番好大信心, 宜家好期待佢既演唱會 :)

空中巴士A380

昨天工作好有衝勁, 可能一早起身就做左件盛事, 就係為左空中巴士A380而早起身幫佢影相, haha...
我係屋企望出去, 其實有好多高樓大廈擋住, 一路睇住電視一路又望住天空, 怕錯過........心情又緊張又興奮, 最後當然好開心啦, 比我係樓與樓之間都影到幾張 :)

飛機真係飛得幾低, 好大隻啊, 不過又好輕型

一套不能錯過的電影~~不能說的秘密

未上影睇故事大剛已經想睇, 我幾鍾意睇愛情戲, 鍾意超感人仲要喊到死果隻, 不過呢套戲係因為鍾意周杰倫而想睇

之前都無聽見朋友們表態有意思要睇, honey又話無興趣, 之後又因為好忙遲遲都未睇, 好幾次學完普通話想自己一個睇又唔知點解唔舒服要立即回家, 好像跟佢沒有緣份似的.

陸陸續續聽見有好多好評, d friend 既blog 又話呢套係一套不能錯過的電影, 忍唔住終於係呢個星期睇左.

實在太正, 故事都係一般愛情影片不過我覺得幾特別, 我最鍾意係周杰倫同果個鋼琴王子比賽個part, 好好睇,好值得回味.

睇完之後果幾日, 瘋狂愛上周杰倫, 瘋狂咁聽佢d歌, 想睇多次, 亦打算買sound track 不過已經賣斷市, 仲有想學番鋼琴 ..... 佢令我好多心......

179分

夏天好似特別多野玩咁, 係好多抉擇既活動+運動裡面, 我都盡量keep住打保齡球.

現在平均一星期都打一次波, 有時好休閒咁打下, 有時係認真咁練波. 當然練習多d進步多d, 但時間和金錢上都唔許可, 所以一星期一次都可以接受, 亦是有用的, 最少keep住個姿勢, 亞sir話"唔打得都睇得". 我姿勢都keep得幾好架.

有日去左奧海城打波, $42一局都幾貴, 可能因為貴,就更比心機打, 好好好開心呀,越打越好, 竟然係奧海城衝破自己既紀錄, 打出179分. 好開心呀. 真係好開心. 仲幫自己拉高左d平均分. 實在太興奮, 果晚忍唔住要請同事食飯tim : )

2008北京奧運之星

我對北京既印象都幾好, 去過旅遊, 去過工作, 覺得地方都幾清潔, 有機會都想再去.
知道有個北京奧運志願者招募活動, 我立即參加.

7月28日下午有個written test, 1個鐘mutiple choice + 1 個鐘中英文作文.

50條m.c. 對我黎講都幾深, 有90%唔識答, 有幾條題目好似好淺, 例如問2008年奧運幾時開幕典禮? 我好似答左8月1號, 又例如問奧運果5個圈係咩顏色... 我答對架不過都係估估下... 不過大部份既題目真係深架, 邊年既奧運會係邊到舉行, 邊年既 殘奧會又係邊到舉行, 又會問北京既四合阮係邊個住等等等.....

其實事前大會send左隻email比我, 提到筆試內容的範圍, 我有想過準備一下, 不過當見到有10條link裡面又幾十條link, 一大堆文字又細細粒, 唔會有心機睇, 最後我考天才, 考自己有幾多知識.

Honey話我咁基本既知識都唔識答, 話我又偷懶又唔付出, 一定做唔到奧運之星..... 不如叫奧運流星 :(

澳門一日遊

7 月14日跟同事去左澳門玩, 安排左好耐架喇, 終於成行.

果日天氣超級熱, 報告有36度, 我覺得天文台詭我, 果日應該有38度或以上.

呢個唔係咩五星豪華團, 唔係觀光團, 而係一個食團,周圍食不停.

Jane係澳門人, 所以邊都有好野食都帶我地去, 食咩先食咩後已經唔係好記得, 不過真係食左好多野, 豬排包, 旦撻, 餃子, 炸雞脾, 芒果什果冰, 大棻糕, 水蟹粥, 雪糕, 仲有仲有.........之後仲食到胃痛, 夜晚仲去觀光塔食buffet, 好瘋狂.

其實之間去左幾間新睹場, 仲有博物館, 點解有景點? 其實係太熱, 搵地方嘆冷氣jar.....

果日玩得好開心呀, 係熱左d, 不過一班人一齊吃喝玩樂又的確好開心

多謝Jane 既安排, 行程唔緊密, 我最愛係炸雞脾, 好好味呀, 以為一間普通快餐, 點知勁勁勁好味. 多謝哂. 仲有多謝cliff 咁落力為我地影左咁多靚相.

報平安

親愛的好朋友們,

我很好,不用擔心!
無時間update blog 只是藉口, 其實我偷懶.......
呢個6,7月發生左好多事, 好多野都想分享下....

如果明天8號颱風, 我會坐定定update番.
比d耐性等等.... heee...

沒有你在身邊, 我的日子並不好過

你好嗎, 很掛念你啊....


以往工作上有阻滯, 跟你吐吐不快, 說說笑就可以忘記
真的很喜歡跟你聯天說笑, 我們每天都有好像有說不盡的話題
跟你一起開心快樂的時候實在太短


旅行後,繁忙和不愉快的工作同樣地纏身, 只有你離開我.........
我仍然用心工作, 但是少了你的共鳴和鼓勵

今天我又再遇上困難, 梗重傷至傷痕累累........
我心情壞透了
做什麼也提不起勁
還有失眠
我的笑容當然不知跑了那裹?

借用你的失憶正和笑容用下可以嗎?

鼓勵

碰到低潮, 自己鼓勵自己,

不需要乞求, 也不需要依靠別人, 別放棄自己